ما هي الكورونوفوبيا

#الكورونوفوبيا

القلق و الحزن و الخوف و كل المشاعر دى ربنا مخلقهاش فينا عبثا او عشان يعذبنا بالعكس المشاعر دى ربنا اوجدها فينا عشان تحمينا من الخطر و تدفعنا لقدام و تخلي عندنا الدافعيه للنجاه و النجاح.

زى مثلا لو وراك حيوان مفترس و انتا مخفتش او قلقت مش هتجري ولا هتبعد عنه ...

و اما كنا صغيرين كنا بنزاكر عشان خايفين نسقط فبيبقي عندنا دافعيه و طاقه اننا نتحدى اي ظروف .


يبقي القلق دا ظاهرة صحية و ليها فوائد نفسيه كتيرة بس كلامى دا بينطبق علي القلق الصحي الي فالحدود الطبيعيه .


طب امتى قلقنا و خوفنا يبقي مش ظاهر صحيه و يبقي قلق مرضي ؟

الاجابه باختصار لما ميحققش وظيفته الي هى انه يحمينا او يدفعنا للافضل لا دا بالعكس دا بيعطل حياتنا و بيخلينا مش عارفين نعمل اي حاجه و ممكن نقرب كمان لمصادر الخطر او يحصلنا تجمد و عدم مبالاه بسبب القلق المرضي الشديد زى المقال الي وضحتهولكم فالأول احنا لما كنا بنزاكر عشان خايفين نسقط طب فحاله القلق المرضي بيحصل العكس من كتر القلق مش بنزاكر أصلا و لا بننام ولا بنمارس حياتنا بشكل طبيعي .

بالإضافه إن الجسم بيقي متحفز دايما انه فيه حاله خطر و تهديد لبقاءة يعني لو انتا قدامك أسد دلوقتي هل هتعرف تاكل او تشرب او تشتغل؟

لا طبعا بالإضافه انك هتلاقي نبضك بيدق جامد و بتعرق و تفكيرك كله توقف و ايدك بترتعش و ضغطك علي و كل الأعراض الي ناس كتير بتشتكي منها دلوقت بالإضافه الارق و النوم المتقطع و العصبيه الزائده.

و للاسف كل دا بيخليك ممكن تتصرف ال ٣ تصرفات دى :

- اما انك تقف تبحلق للاسد و تستني انك تتاكل و انتا متنح و متجمد و مش عارف حتى انك تصوت او تجري الي هو فحاله الكورونا إن الناس بتنام طول اليوم من كتر القلق و التوتر

- اما انك تتصرف تصرفات طائشه و متهورة و غير مدروسه لأنك مش عارف تفكر أصلا و دا بالظبط الي حصل فمظاهرات الاسكندريه الي ضد الكورونا من شده القلق و الخوف.

- اما انك متعملش حاجه غير انك تقرب لمصدر الخطر و تتظاهر بالقوة و اللامبالاه و فصل المشاعر و الضحك كحيل دفاع نفسيه من شده القلق و الخوف بردة زى الناس الي بتقول يا عم كورونا إيه احنا مصريين دا الكورونا تخاف مننا.

- اما انك تهرب من شده القلق و الخوف عن طريق السلوكيات الانسحابيه او التعويضيه زى الاكل الكتير و النوم الكتير او السجائر او حتى الدخول في علاقات عاطفيه بشكل اندفاعي .

- اما المبالغه في الحمايه عن طريق انى طول النهار انضف و اطهر ايدى و فكرة انى ملوثه و هعيا مسيطرة لدرجه ان ايديك بتلتهب من كتر الغسيل. و هو دا ال ocd

- إن الجسم بيستجيب لقلقك و خوفك الشديد عن طريق أنه بيهيألك انك هتموت دلوقتي و هى دى ال panic Attack


طيب ايه اصلا أنواع اضطرابات القلق :

لأن العامه بيفتكرو إن اضطرابات القلق دى نوع واحد و دا مش صح لان اضطرابات القلق بتنقسم ل :

- اضطراب القلق العام

General Anxiety Disorder

(G.A.D)

- اضطراب الوسواس القهري Obsessive Compulsive Disorder

(O.C.D)

- اضطرابات الهلع

Panic Disorder

- اضطراب كرب ما بعد الصدمة

Post traumatic stress disorder

(P.T.S.D)

- اضطرابات الرهاب ( الفوبيا )

PHOBIAS

دى أنواع اضطرابات القلق و الي بتحصل بكل انواعها لينا دلوقتي مع ظهور فيروس كوفيد ١٩( الكورونا) الي فجر ظهور اضطرابات القلق لدى الكثير من الأشخاص.


انتظرو الجزء الثاني من المقاله ع كيفيه مواجه و علاج اضطرابات القلق الي تم ظهورها بسبب الكورونا.